KAIBIGAN, BUHAY KA SA AMING ALAALA

Noong dumalaw kami sa labi ni Felix ay napabulong ang aking asawa nang “Felix, bakit nandyan ka?” malungkot kami habang nakatingin kaming mag-asawa sa walang buhay niyang labi sa Oro Funeral Homes malapit lamang sa dati niyang tinitirhan sa Balic-balic.

Nandoon ang ilang mga kaibigan sa press at showbiz. Naroon din ang mga mukhang hindi namin nakita ngunit naging bahagi din ng kanyang makulay na buhay.

Lumabas agad kami..tinangka naming tanungin ang mga tao sa paligid kung ano ang dahilan ng kanyang pagkamatay ngunit, hindi ko na magawang muling bumalik sa loob kung saan nakalagak ang kanyang labi..dire-diretso na kaming bumaba.

Yun na ang una at huli kong silip sa kanya at ayaw ko nang bumalik pa. Ayoko siyang makita sa ganoong kalagayan. Madalas ko ngang sabihin na mas gusto ko pang naaalala ang isang namaalam na sa sandaigdigan sa estado noong siya ay buhay pa. Para bang namasyal lang siya sa ibang lugar kaya hindi na kami magkikita. Sa aming pagbaba, hindi na ako nakapag-paalam sa kanyang mga naulila.

Buhay sa amin ang iyong alaala kaibigan, di ka namin malilimutan.

PAALAM, KAIBIGAN

Minsan talagang dumarating sa dulo ng buhay ang isang tao. Kung baga nga doon talaga papunta ang lahat ng sangkatauhan pagsapit ng dapithapon.

Sumakabilang buhay kamakailan ang aming mabait na kaibigang si Felix Espinosa photographer at columnist ng iba’t-ibang tabloid.

Nagkaroon siya ng matinding karamdaman nitong mga nakaraang taon na nagpabagsak sa kanyang katawan. Nakikita na ng marami ang mga sintomas ng kanyang sakit ngunit matapang talaga si Felix..nilabanan niya ang nararamdaman niya na parang wala lamang.

Nabalitaan namin na umuwi siya sa probinsiya kamakailan ngunit ginulantang kami ng balita nuong isang araw...sinabi sa amin ni Rody Pisuena na siya nga ay sumakabilang buhay na.

Nakilala siya bilang “ME NAME KA BA?” sa Bulgar tabloid na may pangaraw-araw na sirkulasyon. Nakadaupang palad ng mga sikat at sumisikat pa lang sa mundo ng showbiz.

Masasabi nating sa kanyang napiling propesyon naitatak niya ang kanyang pangalan at reputasyon bilang isang magaling na photographer at manunulat. Pala-kaibigan at marunong makisama kaya naman nakilala at pinagkatiwalaan.

Wala kaming masasabi sa kanyang taos-pusong pakikipagkaibigan sa aming mag-asawa, nagkakaroon man ng mga tampuhan na natural lamang sa mundong aming ginagalawan, ang tagal ng aming samahan sa mundo ng pagsusulat ay hindi mapapantayan.
Sa iyong pagbabalik sa ating AMA sa kalangitan, mararamdaman namin ang lungkot ng iyong pagkawala, hindi ka namin malilimutan.

Isang araw lamang ang burol ni Felix dito sa Maynila. Bukas na ang libing. Sana ay makadalaw man lamang ang makakabalita. Huling pagkakataon na ting makikita ang isang matalik na kaibigan. Ayon kay Rody Pisuena..nasa Oro Funeral siya ngayon. Nakikidalamhati ang aking pamilya sa mga naulila ni Felix Espinosa.