ANG MAKABAGONG JOB

Danilo Jurado with Direk Bobby Benitez's Angels

Naging isang surpresa ang pagkakatanggap ng inyong lingkod na mapabilang sa isang stage play.  Ang play ay pinamagatang “Job”, ito ay sa direksyon ni Cesar P. Macaspac Sr. Ang “Job” ay tungkol sa isang pinagpalang alagad ng Diyos na naharap sa napakaraming pagsubok mula sa kamay ni Satanas.
 
Ang “Job” ay nakapagpalabas na kasama ang inyong lingkod sa Pulilan Central High School noong Hulyo 13 (taong kasalukuyan), kasunod pa dito ang ilan pang parte ng Bulacan ilan pang palabas sa Pampanga at Angat.

Direk Bobby Benitez playing the role of Satan in Job Muog ng Pananampalataya, together with his Angels.

Dito ko nakilala ang isang bagong kaibigan na Coordinator ng “Job”  na si Roger Iral, ngunit matagal na palang kakilala ang aking asawang si Linda. Dati na pala silang magkatrabaho sa Regal Films. Napag-alaman ng inyong lingkod na ang Bise Gubernador ng Bulacan na si Daniel Fernando ang dating tumatayong “narrator” sa nasabing pagtatanghal noon.
 

(L-R) Amante Pulido, Edgar Lo, Tony Leyba, Apo Norman Corpuz taken at Pulilan Central School

Masasabing napapanahon ang “Job” sa dahilang ito ay akma sa mga bagay na nangyayari sa atin at sa ating mga kababayan sa kasalukuyan. Ang mga Filipino, noon pa man ay pinagpala at maraming biyaya ang ibinibigay sa atin ang ating Ama sa Kalangitan.
 
Ngunit sa ngayon, tayong mga Pinoy ay sumasabak sa maraming pagsubok na talaga namang napakahirap. 

Marami sa atin ang nakararanas na hindi makain sa araw- araw. Ang pagkakaroon ng ilan ng mga sakit na wala ng lunas, mga kalunos-lunos na sitwasyon ng pang-aapi sa ating mga OFW’s, pang-aalipusta at pangmamaliit sa atin ng ilang karatig bansa sa Asya at kurapsyon mula sa ating mga pinagkatiwalaang mga pulitiko na dapat sana ay magbibigay ng benepisyo sa ating mga mamamayan dahil sila ay mga "public servants" ng bayan.
 
Sa aking pananaw, tayo ang makabagong “Job”, dahil ang mga pagsubok na ito ay ating malalampasan dahil tayong mga Filipino ay may solidong pananampalataya sa Ating Ama sa kalangitan.

LAKBAY TULONG PANGKABUHAYAN NG CIS- NCR

Silang mga nasa larawan ang mga barberong boluntaryong magbibigay ng serbisyo. 
(Photo by: Danilo ‘Rico’ Gascon)

Gupitang Bayan Bara-baranggay tuwing 

Sabado’t Linggo pati na rin ang Holiday 9am – 3pm

     “Makatao at makabayang adbokasiya, kapit-bisig para sa pagsugpo ng kriminalidad. Sapagkat ang kahirapan ang isa sa ugat ng krimen”. Para sa mga miyembro na nagnanais magkaroon ng dagdag kaalaman pangkabuhayan, makipag-ugnayan sa pinakamalapit na sangay ng CIS na nakakasakop sa inyong chapter upang mapabilang sa iba’t-ibang uri ng seminar at training.

     Ito ay kasalukuyang nagaganap na sa bawat barangay sa masigasig na pangunguna at sa matapat na paglilingkod ni NCR-CIS President Mr. Elmer Bernardo at mga NCR district President in respective communities sa suporta ng kagalang-galang na Congressman na si Hon. Samuel Pagdilao ng ACT-CIS. - Kiran Singh

Lumabas sa X-Files Vol.6 No. 339 Setyembre 8, 2013
 
 
"Isang inspirasyon para sa ating mga Filipino ang ginagawa ng grupo ni Kiran Singh ng NCR-CIS para sa ating mga kababayan. Sa kaunting paraan ay nabibigyan nila ng kasiyahan at pag-asa ang ating kapwa Pinoy. May Gupitang Bara-baranggay na gaganapin malapit sa Luneta Park sa susunod na buwan. Nawa'y mabigyan natin sila ng ating suporta. "- Danilo Jurado

Mga Ala-ala sa Operetang Putol-putol

Ito ang poster ng pelikulang Operetang Putol-Putol, makikita sa larawan ang aking mga kasamahan noong kanilang kabataan at katanyagan, ilan sa amin ang nagkaroon ng mas matitingkad na career matapos ang Martial Law. Photo courtesy of Video 48

Nakita ko ang larawang nasa kanan-ibabang bahagi ng lathang ito, habang nagtabi-tabi ako ng gamit sa bahay, kadalasan bibihira lang namin magawang mag ayos-ayos. Dahil na rin siguro sa trabaho naming mag-asawa sa mundo ng pagsusulat. Kadalasan ay wala kami sa bahay at kung saan-saan kami pumupunta upang makakuha ng mga sangkap na idadagdag sa aming mga isinusulat na storya. Ito ang ilan sa cast ng Operetang Putol-putol. Ako yung naka-pulang long sleeve polo.

Nakaluhod ako at nasa aking tabi ang malapit kong kaibigan na si Danny Taguiam. Naka tayo sa may likuran namin sina Esperanza Favon, Elizabeth Ledesma at Dolly Favorito. Ang isa sa tinaguriang Elvis Presley ng Pilipinas na si Buddy Castillo ay nasa likuran nina Beth at Espie. Kasama namin ang ilang kamag-anakan at pamilya namin. Kuha ito noong ihatid namin si Johnny de Leon papuntang Amerika. 

Marami akong magandang karanasang di malilimutan bilang isa sa cast ng nasabing radio show.  Noong kasagsagan ng batas militar sa Pilipinas ay isinara ang aming programa, ngunit kalakip ang pangako na sa paghupa ng Martial Law ay kami pa rin ang magkakasama, hanggang sa magiging mga anak-anak namin.

Ngunit noong humupa na ang sigwa ng Martial Law ay iba na  programang nasa ere, pero ganoon din ang tema. Sabi nga, life goes on. Hindi na namin inalam kung ano na ang nangyari at hindi natupad ang mga binitawang salita. Nagpatuloy kami sa aming pakikipagsapalaran sa buhay. Si Tessie Lagman na aming titser at si Ben David na aming principal ay patuloy na naging broadcasters nang mahabang panahon.

Ang larawang ito ay kuha sa loob ng DWBB nuong aming binisita si Manolo Favis ilang taon na rin ang nakararaan, kasagsagan ng kanyang portion na kung tawagin ay "mix-mix". L-R Elizabeth Ledesma, ang inyong lingkod na nakatayo Danilo Jurado, Dolly Favorito at ang kanyang kaibigan, at ang aking ninang na si Tessie Lagman-Balboa

Ang aming scriptwriter/director na si Manolo Favis ay patuloy pa ring mapapakinggan sa DWBB ng Kapuso Network hanggang sa kasalukuyan.

Naging sikat na sikat na mga artista at singers naman sina Edgar Mortiz, Jay Ilagan at Perla Adea. Habang ang inyong lingkod, Danny Taguiam, Dolly Favorito, Elizabeth Ledesma, Joe Alvarez at Richard Merk ay nag-abroad.

Ako at ang aking kaibigan si Danny Taguiam noong nasa Japan kami.

Nag-aral muna ako ng sayaw at naging choreographer ng traditional dances para sa mga talents na gustong pumunta ng Japan. Later on, nakapunta ako sa Land of the Rising Sun. Nagkahiwalay-hiwalay kaming magkakaibigan at kung saan-saan na kami dinala ng tadhana, ngunit kapag may oras ay nagkikita-kita din naman.

Naging ninang (sina Perla Adea, Ezperanza Favon at Dolly Favorito) at ninong (Jay Ilagan, Danny Taguiam, Richard Merk at Edgar Mortiz) sila ng aking mga anak. Ninang naman naming mag-asawa sa kasal si Tessie Lagman -Balboa.

Minsan ay nagkaroon kami ng isang memorable get-together para kay Tiya Dely ilang taon na ang nakaraan.

Isang get-together ng Operetang Putol-putol para sa veteran broadcaster na si Tiya Dely, ilang taon na ang nakalilipas, ito ay natupad dahil sa kabutihang-loob ng mag-asawang Richard at Roni. L-R Danilo Jurado, Dolly Favorito, Esperanza Fabon, (veteran broadcaster) Tiya Dely, Richard Merk, Danny Taguiam, and Edgar Mortiz

Nagkaroon din naman ng pagkakataon na muli naming binuhay ang aming radio career sa pamamagitang ng Opereta Extravaganza na aming ginawa ng mahigit sa tatlong taon. 

Ang inyong lingkod kasama ang aking mga kaibigan na sina Dolly Favorito at Danny Taguiam

Naging posible ito, dahil na rin sa kabutihang loob ng isang mabuting kaibigan na si Andrew Gutierrez at ang aking ninang sa kasal na si Tessie Lagman. Naging masigasig muli kamin at naging active sa aming buhay showbiz.

Ang aking mga kasama sa Opereta Extravanganza. (L-R Andrew Gutierrez and companion, Dolly Favorito, Elizabeth Ledesma, at ninang Tessie Lagman-Balboa, magkatabi namang nakaluhod sina Danny Taguiam at ang inyong lingkod Danilo Jurado

Marami man ang nagsasabi sa amin ng negatibo ukol sa aming muling pagsasa-ere ng aming programa, ipinagsawalang bahala namin ito dahil ito na ang nakagisnan naming mundo nang aming pagkabata at hindi na maiaalis sa aming katauhan. Sa aming naging buhay sa entertainment world, hindi na namin makakalimutan ang aming mga naging karanasan dito habang kami'y nabubuhay.

 

PANGAKO mas malimit mapako

PARA sa inyong lingkod, ang pangako ay isang salitang dapat na bigyan ng halaga. Dahil sa pamamagitan nito ay makikilala mo ang isang tao kung dapat pagtiwalaan o hindi. Sa aking pagkaka-alam, kung ikaw ay isang lalaki, at nagbitaw ng isang salita lalo’t ito ay pangako, kailangan mong itong gawin o gawan ng paraan upang di ka masira sa pinangakuan mo.
Kung sabagay in fairness, sabi sa salitang banyaga, “Promises ARE made to be broken”. 

Iyan ay isang uri ng pagtatanggol ng mga taong walang isang salita. Pasintabi po, para sa akin ang mga ganitong tao ay walang kuwentang tao.
 
Dahil bago ka magsalita ng isang bagay, tiyakin mo muna kung kaya mo itong gawin. Maliban lamang kung gusto mo lang paasahin ang taong pinangakuan mo o pinagyayabangan mo lang ito.
 
So, kapag ganito ang ugali mo, hindi ka karapat-dapat naging tao. Ang nararapat sa iyo ay maging hayop. Sapagkat ang mga hayop ay walang kapwa tao, kasi nga, hayop sila eh, he.. he.. he..!
 
* * *

Makabagong salesman... walang modo?

Kamakailan lamang ay pinasok ako ng dalawang salesman sa aking opisina at inaalok ako ng kanilang produkto. PR sana sila, pero mga bastos na basta na lamang pumasok sa loob ng opisina ko ng di man lang kumatok o nagbigay pugay.

Iyan ba ang mga ugali ng mga Salesman ngayon?  Sa totoo lang, kailangan din namin ng mga salesman na gaya nilang ma-PR at mahusay magsalita. Pero kung bastos naman, di ko na sila kailangan.
 
Naging salesman din ako noong kabataan ko at ang unang pinag-aralan ko ay kung paano ko kakausapin ng di maiinis ang taong kakausapin ko.
 
Dito ko nalaman na kailangan pala ay kumatok ka muna sa pintuan kapag nakasara ito at kung bukas naman ay mag-magandang araw ka muna bago ka lumapit sa taong kakausapin mo.
 
Kasi, kapag bastos ka, malamang na mabastos ka rin ng taong aalukan mo ng iyong ilalapit sa kanya. masasayang tuloy ang laway mo.

ANG NAKARAAN AY NAKARAAN NA, HARAPIN ANG KASALUKUYAN

MARAMING nakaraan na dapat ng kalimutan dahil sabi nga sa English, “Past is past” na siya namang tama. Naalala ko tuloy ang salitang ito ay unang narinig ng ko ang ganitong katag sa isang dalagita na ang pangalan ay Vilma Santos sa  Gubat, Sorsogon kung saan nag-shooting kami ng “The Longest Hundred Miles”. 

Dala-dala ang ganoong pananaw sa buhay ang marahil nagpatibay ng katauhan ng Star for All Season na minahal ng kanyang mga kababayan at naging mahusay na Mayor ng Lipa, Batangas at Gobernor ng Batangas.

Ayon sa kanya, “Ang nakaraan ay isa na lamang ala-ala na di na muling maibabalik pa.” Ang mga katagang binitiwan ni Gob. Recto ay ang mga masasayang naganap noong bata pa kami. Kung di ako nagkakamali, mga dose anyos (12 yrs. old) lang noon ang magaling na public servant at mga labing tatlo o labing  apat na taon (13 to 14 yrs. old) naman ako.
 
Ilibing na natin ito sa limot ang sakit upang magbigay kaluwagan sa ating mga puso. Harapin na natin ang kasalukuyan. Marami tayong magagandang magagawa sa kinabukasan kung atin itong pag-aaralan at paghahandaan. Kailangan tayong maka-move on.
 
Lungkot man ang ating tinamasa dapat lamang kalimutan ang sakit, ngunit tandaan lahat ng leksyon at mga nilalang na nagdulot nito upang di na muling maulit pa sa atin at  upang di na ito mangyari pa sa ating kapwa.

Joseph Estrada.... tunay na Manila Boy

Kung natatandaan ninyo ang mga pelikula ng dating Pangulong Joseph Estrada, malalaman mong siguradong wala siyang talo sa pagtakbo niya sa Maynila. Kaya naman tinalo niya bilang mayor ang magiting na si Mayor Alfredo Lim.

Malaki rin naman ang nagawa ng tinagurian dirty Harry ng Maynila. Subalit pinili ng lehitimong Manileno ang tunay na Manileno na walang iba kundi ang elect mayor na si Joseph Ejercito ‘Erap’ Estrada. 

Mahal ni Joseph ‘Geron Busabos’ ang Maynila at laan siyang mamatay para dito. Maganda ang layunin niya para sa mga tagarito. Ayaw niya ang nang-aagrabiyado. Iyan ang papel niya sa “Geron Busabos ANG BATANG QUIAPO”

Mag kasama naman sila ng King of Philippine Movies, Fernando Poe Jr. sa pelikulang pinamagatang "ITO ANG MAYNILA" gumanap ang inyong lingkod bilang batang kapatid ng ating mayor ng Maynila.
 
Samantalang sa ‘MARKANG REHAS’. Mula sa bilibid ay nakalaya siya pamamagitan ng Parole. Bilang isang Parole, kailangan niyang umiwas sa gulo. Kaya naman ang mga dating takot sa kanya ay ang siyang gumagawa ng paraan upang pumasok siya sa pakikipag-away.
 

Si Mayor Joseph Ejercito Estrada kasama ang inyong lingkod sa isang eksena ng "ITO ANG MAYNILA

Una niyang nilalapitan ang Poong Nazareno kapag may problema siya. Lahat ng iwas ay ginawa niya huwag siyang mabilanggouli. Ngunit ng idinamay na ang kanyang Ina (Mary Walter) at kapatid na pilay (Danilo Jurado) ay lumaban na siya.
 
Nang mapatay na niya ang kanyang mga kalaban at marami na siyang tama ay pumasok siya sasimbahan upang humingi ng tawad sa kanyang itinuturing na pangalawang ama at iyan ay walang iba kundi ang Poong Nazareno. Sa mga nagawang kasalanan.
 
Sa tunay na buhay man o sa kanyang mga pelikulang nagawa, ipinapikikita niyang, talagang mahal niya ang Maynila at ito ay naramdaman ng mga Manileno. Kung kaya iniluklok siya ng mga ito bilang kanilang Mayor.




ORBIT BALITA
Entertainment Section
Vol.2 No.2 June 3-9, 2013

MAYNILA, bilang Capital City ng Pilipinas, ibabalik na!

Marami ang nagpagandang Maynila. Marami rin namang nagpaligaya sa dito. Subalit ang tunay na saya at kagandahan nito ay di naramdaman ng lahat. Para bagang laging may kulang.

Sa pagkaka-alam ng inyong lingkod, mayroong hinahanap ang karamihan sa upang gumanda at maging maligaya ang mga taga-Maynila, at ito ang malamang na gawin ng ating bagong halal na Mayor Joseph Ejercito Estrada at nang kanyang Vice - Mayor na si Isko Moreno.

Minsan kasi, hindi lang ganda o saya ang kailangan din naman ng tao man o lugar ang kalayaan at  ng puso. Kung may ganda, kasiyahan, kalayaan at may puso ang bawat ginagawa, wala ng hahanapin pa.

Walang mayaman, walang mahirap ang lahat ay pantay - pantay sa lahat ng bagay. Sa kapwa Pilipino, mga naturalisadong Pilipino o may lahi ng ibang bansa. Ang lahat ay may karapatan sa pantay - pantay na karapatan sa ating Maynila.

Walang tinitignan, walang tinititigan. Iyan ang magsasa-ayos ng Lungsod ng Maynila. Ibabalik na ang dating Maynila ang Capital City ng Pilipinas. Subalit kailangan din nating maunawaan na hindi ganoon kadali ang lahat ng ito.

Kakailanganin ng ating mga mamumuno ang suporta ng bawat Manileno. Kailangan din nila ang pakikiisa ng mga mamamayan nito. Ang pagsunod sa mga batas na ipapatupad ng ating bagong mga halal na kandidato.
Sa pamamagitan nina Mayor Joseph Ejercito Estrada, Vice-Mayor Isko Moreno sampu ng kanilang mga halal ng bayang mga Konsehales ay kanilang gagawin ang mga nararapat para sa Maynila...


ORBIT BALITA
Vol.2 No.2  June 3-9, 2013

PAANO KUNG FLAT ANG GULONG NG ATING BUHAY? (Rev. Ver. Weder)

Kung minsan di talaga maintindihan ang panahon, minsan sobrang lamig. Minsan naman sobrang init. Sa ngayon ang bansang Pilipinas ay nakaranas ng pinakamalamig na panahon tuwing sasapit ang gabi, samantalang mainit kapag sumisikat na ang Haring araw.

Maihahalintulad ito sa buhay natin sa mundong ibabaw, kung minsan ikaw ay nasa ibabaw at kung minsan naman ay nasa ilalim ka.

Naaalala ko tuloy ang pag-uusap namin ng aking kaibigan na si Jay Ilagan noong nabubuhay pa siya. Mula bata ay nakasama ko na siya sa mga pelikula kung saan pag magkasama kami.

Kadalasan siya ang nakababatang kapatid ni Kuya Ronnie o kilala bilang Da King na si Fernando Poe Jr., samantalang ako naman ang gumaganap sa papel ng nakababatang kapatid kay Kuya Erap o ang ating Presidente na si Joseph Ejercito Estrada.

Maalwan sa buhay ang pamilya ni Pareng Jay, kaya naman madalas niya akong bigyan ng payo dahil sa mga pagsubok na dumarating sa aking buhay.

Aniya, "Pare ang mundo ay parang gulong, minsan ay nasa taas ka at kung minsan naman ay nasa baba ka, pagulong-gulong lang ang buhay. Alam mo pare ang gulong ko nasa kalahatian pa lang, papuntang itaas, ikaw makakarating din duon".

Ang sabi ko naman, "Alam mo pards ang gulong ko hindi na aabot kahit sa kalahati." Bakit naman?" sagot niya. Tugon ko "Pards, paano makakarating doon eh flat ang gulong ko."

Mapapailing na lang siya dahil lumalabas na katawa-tawa ang aking sinasabi. Pero masasabi ko na paano nga kung ito ang nararamdaman ng karamihan sa mga taong marami na ang dumating na di pangkaraniwang pagsubok sa buhay, at maging sa kanilang mga supling ay ganoon din ang sinasapit na tadhana? Masasambit ba man lang nila  na ang buhay ay isang gulong lamang?

Napapangiti na lang ako pag-naaalala ko yon at madalas kong maikuwento ito kay misis. Totoo man ang sinabi ni Pareng Jay para sa ilan pinapalad na makaangat sa buhay at matikman man lang ang pagiging kumportable, ngunit kailangan nating tanggapin ang realidad.

Ang buhay hindi kasing simple na tulad sa isang gulong. Di tiyak ang kahihinatnan ng buhay ng tao sa mundo. At iilan lang siguro ang pinagpala na magkakaroon ng maayos na sitwasyon sa buhay na walang problemang naghihintay.

At sa iilang pinalad na makakuha ng kanyang maliit na paraiso dito sa lupa, dapat na itong ipagpasalamat.

Nawa’y patuloy tayong magsikap at magtiwala sa ating Ama sa Langit na nakakaalam ng lahat.

PAGALING KA TITO VIR, WE MISS YOU!

Photo taken at Victoria 1 Building . L-R (Danilo Jurado, my wife Linda, Doreen Alba & Tito Vir Mateo

Nag text sa akin si Jojo Montemayor at sinabing ang Entertainment Editor namin sa Philippine Courier na si Vir Mateo ay kukunin na ni Renato del Prado na nasa US doon na umano siya magpagaling.

Last year, Tito Vir suffered a heart attack at an MRT station. Nagpapasalamat naman kami sa Diyos at sa mga tumulong na ilang kasamahan niyang pasahero dahil isugod siya kaagad sa ospital.

Naabutan namin siya ng asawa ko na inaasikaso ng mga kaanak at ilang kaibigan sa showbiz, nandoon din at nagbigay ng suporta ang pinsan ko na si Janice Jurado.

Sa pagkakaalam ko ay under therapy pa si Tito Vir kaya kung totoo ang text sa akin, mas maganda na nga itong pangyayari para sa kanya. Pagaling kang mabuti Tito Vir!